Starfsfólk Lífs og sálar hélt upp á 25 ára afmæli stofunnar með málþingi á dögunum, en hún var stofnuð árið 2000 af sálfræðingunum Þórkötlu Aðalsteinsdóttur og Einari Gylfa Jónssyni og er í dag rekin af fimm konum. 

Málþingið nefndist Fortíð, nútíð og framtíð í mannauðsmálum á Íslandi og voru fengnir flottir fyrirlesarar með áhugaverð erindi. Meðal fyrirlesara var Þórkatla Aðalsteinsdóttir, stofnandi fyrirtækisins, en hún er fremst í flokki hérlendis á sviði vinnusálfræði. 

Þá voru einnig með erindi Helgi Héðinsson mannauðsleiðtogi Veitna um þær áskoranir sem mæta mannauðsfólki í dag og Guðbjörg Linda Rafnsdóttir, prófessor í félagsfræði við Háskóla Íslands, sem fræddi viðstadda um notkun gervigreinar í mannauðsmálum. 

„Við erum auðvitað voða montin af þessum stóra áfanga að vera orðin 25 ára og viljum halda áfram að fagna allt árið! Ætlum t.d. að fá til okkar helsta sérfræðing á sviði vinnusálfræði í heiminum til landsins í október eða nóvember og halda þrjú námskeið í samstarfi við hann. Sá heitir Ståle Einarsen og við höfum átt náið og gott samstarf við hann í gegnum árin en hann hefur tvisvar sinnum áður haldið námskeið í samstarfi við okkur sem hafa vakið mikla lukku á meðal mannauðsfólks og stjórnenda,“ segir í tilkynningu frá Lífi og sál.