Fjórir stærstu stjórnmálaflokkarnir hafa fengið tæplega sex og hálfan milljarð úr ríkissjóði síðan 2007. Alls hafa stjórnmálasamtök fengið úthlutað rúmlega 9,1 milljarði á tímabilinu, þar af á annað hundrað milljónir í sérstaka styrki vegna kosningabaráttu. 

Þetta kemur fram í svari Daða Más Kristóferssonar dómsmálaráðherra við fyrirspurn Árna Helgasonar, varaþingmanns Sjálfstæðisflokksins.

Árni óskaði eftir upplýsingum um hversu háir ríkisstyrkir til stjórnmálasamtaka hafa verið frá því að lög um starfsemi stjórnmálasamtaka tóku gildi í janúar 2007.

Lesa má úr svari Daða Más að alls hafi runnið úr ríkissjóði til stjórnmálasamtaka yfir 9,1 milljarður króna á 19 ára tímabili á árunum 2007 til 2025.

Frétt af mbl.is

Fjárframlög til stjórnmálaflokka verði lækkuð

Sjálfstæðisflokkurinn fengið mest

Sjálfstæðisflokkurinn hefur fengið mest eða rúmlega 2,3 milljarða, Samfylkingin yfir einn og hálfan milljarð, Framsóknarflokkurinn rúmlega 1,3 milljarða og Vinstri græn rúmum 12 milljónum minna.

Alls þáðu 15 stjórnmálasamtök styrki úr ríkissjóði frá árinu 2007 að fjárhæð alls um 8,98 milljarða króna.

Þau eru Björt framtíð sem þáði rúmar 93 milljónir alls á fjögurra ára tímabili frá 2014-2017, Borgarahreyfingin tæplega 91 milljón á árunum 2010-2013 og Dögun sem þáði rúmlega 27 milljónir á árunum 2014-2016.

Flokkur fólksins þáði rúmlega hálfan milljarð á níu ára tímabili frá 2017, Flokkur heimilanna þáði rúmar 26 milljónir á árunum 2014-2016 og Framsóknarflokkurinn rúmlega 1,3 milljarða frá 2007.

Frjálslyndi flokkurinn þáði rúmar 77 milljónir á árunum 2007-2009, Íslandshreyfingin rúmar 24 milljónir á árunum 2008 og 2009 og Miðflokkurinn rúman hálfan milljarð frá árinu 2018.

Píratar þáðu rúman hálfan milljarð frá 2014, Samfylkingin tæplega einn og hálfan milljarð frá 2007 og Sjálfstæðisflokkur tæplega 2,3 milljarða á sama tímabili.

Sósíalistaflokkurinn þáði tæpar 100 milljónir frá árinu 2022, Viðreisn rúman hálfan milljarð frá árinu 2017 og Vinstri græn tæplega 1,3 milljarða frá 2007.

Frétt af mbl.is

Eigið fé flokka frá -35 milljónum í 1,2 milljarða

17 flokkar fengið úthlutað vegna kosningabaráttu

Frá árinu 2013 þáðu alls 17 stjórnmálasamtök sérstaka styrki vegna kosningabaráttu. Þrjár milljónir hvert fyrir kosningarnar 2013, 2016 og 2017 en 4,5 milljónir fyrir kosningarnar 2021 og 2025.

Samfylkingin, Sjálfstæðisflokkurinn, Framsóknarflokkurinn, Vinstri græn og Flokkur fólksins fengu úthlutað vegna allra fimm kosninganna, alls 18 milljónir hver flokkur.

Píratar og Viðreisn fengu úthlutað vegna ferna, alls 15 milljónir og Miðflokkurinn vegna þriggja, alls 12 milljónir.

Aðrir flokkar sem fengu minna voru Björt framtíð og Sósíalistaflokkurinn, sem fengu níu milljónir vegna annars vegar þrennra kosninga og hins vegar tvennra.

Dögun sem fékk úthlutað sex milljónum vegna tvennra kosninga, Lýðræðisflokkurinn, sem fékk úthlutað 4,5 milljónum vegna síðustu kosninga, Flokkur heimilanna, Hægri grænir, Lýðræðisvaktin og Regnboginn þrjár milljónir hver vegna kosninganna 2013 og Frjálslyndi lýðræðisflokkurinn tæpar 1.700 þúsund krónur vegna kosninganna 2021.