Ingibjörg Davíðsdóttir þingmaður Miðflokksins telur nokkuð víst að ef bikblæðingar væru sama vandamál á höfuðborgarsvæðinu og á landsbyggðinni þá „væri allt brjálað“.

Bikblæðingar hafa verið til vandræða víða á vegum landsins og þá sérstaklega í hitanum síðastliðna daga. Bergþóra Kristinsdóttir, framkvæmdastjóri þjónustusviðs Vegagerðarinnar, segir vegi víða illa farna og þá sérstaklega á Vesturlandi. 

Ingibjörg, sem er þingmaður Norðvesturkjördæmis, gerði bikblæðingar að umtalsefni í störfum þingsins fyrr í dag. 

Ingibjörg Davíðsdóttir þingmaður. mbl.is/Karítas

Frétt af mbl.is

Meira umfang bikblæðinga en áður

Leggja til þrjá milljarða

Samkvæmt fjáraukalögum hefur verið ákveðið að leggja til þrjá milljarða til þess að bregðast við vandanum. Ingibjörg sagði í ræðustól Alþingis í dag að þessi upphæð sé aðeins dropi í hafið, þó hún sé vissulega betri en ekkert.

„Ég er örugg á því að ef sama staða væri uppi á höfuðborgarsvæðinu þá væri allt brjálað. Hvers vegna eru bikblæðingar bara á landsbyggðinni? Hvers á landsbyggðin að gjalda? Af hverju eru þessi síendurteknu plástrar þar? Hvers vegna eru bikblæðingar algengari á Íslandi en í öðrum löndum?“ 

Frétt af mbl.is

Langtímaúrbætur þurfi vegna bikblæðinga

Tími klæðninga er liðinn

Ingibjörg bendir á það að staðan sé langverst á Norðvesturlandi samkvæmt gögnum Vegagerðarinnar.

Veltir Ingibjörg því fyrir sér hvort að ódýrustu aðferðirnar verði alltaf fyrir valinu á landsbyggðinni.

„Ódýrt er ekki alltaf best, ódýrt getur verið mjög dýrt. Af hverju er verið að leggja klæðningar á nýja vegi? Árið er ekki 1970 og tími klæðninga er liðinn, það er fáránlegt að þegar við erum ekki að pæla í snjóþyngslum og færð á vegum þá séum við að pæla í bikblæðingum.“