Komið gott-stjörnurnar Ólöf Skaftadóttir og Kristín Gunnarsdóttir troðfylltu Austurbæ í gærkvöldi þegar lifandi viðburður hlaðvarpsins fór fram. Slegist var um miðana á viðburðinn og seldist upp á þremur mínútum. Það þarf enginn að verða stórkostlega hissa á því, allavega ekki virkir hlustendur sem missa ekki af þætti, vakna jafnvel nokkrum mínútum fyrr á miðvikudagsmorgnum til að geta hlustað á alla „sóðuna“ áður en daglegt strit hefst með öllum sínum kostum og öllum. Allir eru jú bara að reyna að lifa sinn dag eins og þær segja sjálfar. 

Komið gott fór í loftið síðasta sumar og sló strax í gegn enda eru Kristín og Ólöf bremsulausar. 

Á viðburðinum í gærkvöldi gekk á ýmsu. 

Kristín og Ólöf höfðu boðað nokkra herramenn í Austurbæ til þess að sitja uppi á sviði. Þessir menn heita Bjarni Benediktsson fyrrverandi formaður Sjálfstæðisflokksins, Þórður Þórarinsson fyrrverandi framkvæmdastjóri Sjálfstæðisflokksins, Jens Garðar Helgason varaformaður Sjálfstæðisflokksins, Jóhann Páll Jóhannsson umhverfis-, orku- og loftslagsráðherra, Jakob Birgisson uppistandari og aðstoðarmaður dómsmálaráðherra, Sigtryggur Magnason fyrrverandi aðstoðarmaður Sigurðar Inga Jóhannssonar, Vilhelm Anton Jónsson tónlistarmaður, Magnús Ragnarsson formaður Tennissambands Íslands og Bergþór Ólason þingmaður Miðflokksins. 

Í Austurbæ var farið yfir ýmis mál eins og til dæmis hvernig gekk hjá Bjarna Ben að skipuleggja fermingarveislu á dögunum. Það verður ekki upplýst hér hvernig gekk en Bjarni Ben fékk sérstaka gjöf frá Komið gott-guggunum; gjafakort á Húðlæknastöðinni ef ske kynni að hann myndi vilja láta svæfa á sér ennið! 

Að öðru leyti verður ekki upplýst um efni samtalsins í Austurbæjarbíó sem verður ekki varpað á öldum ljósvakans frekar en öðrum lifandi viðburðum á vegum Komið gott.