Kínverski förðunarmeistarinn Valentina Li hannaði Les Beiges-förðunarlínuna í samvinnu við franska tískuhúsið Chanel. Li er búsett í Frakklandi en hún ákvað að freista gæfunnar í háborg tískunnar, París. Síðan hún tók þetta stóra skref að yfirgefa heimahagana hefur hún hannað útlit á tískusýningum þekktra hönnuða og unnið með tískuljósmyndurum sem þykja töff. Hún vann áður sem blaðamaður en kvaddi þann heim til þess að láta förðunardrauma rætast.

Í förðunarlínunni vill Li kalla fram allt þetta hlýja og góða sem einkennir sumarið því það er ekki nóg að finna bara lyktina af grasinu og finna sólargeislana kitla húðfrumurnar. Þú þarft að geta hresst upp á ásjónuna með réttu litunum. Eins og til dæmis glitrandi bleik- og brúntóna augnskuggum, ferskjulituðum kinnalit, glærbleikum varalit og rauðbleiku naglalakki sem er eins og slaufan hennar Hello Kittý á litinn. Hversu dásamlegt er það?

Þótt augnskuggi sé borinn á augnsvæðið þá er augnumgjörðin mild. Það er ekki verið að vinna með hnausþykk gerviaugnhár eða þykkt lag af klesstum maskara. Það er heldur ekki verið að vinna með bústn­ar lýtalæknavarir. Allt er vandað, pent og yfirvegað. Og fágað!