Óvíst er hvenær þingmenn komast heim í sumarfrí en til stóð að það yrði gert á morgun, 13. júní. Svo verður hins vegar ekki en þingfundur stendur nú yfir þar sem bókun 35 er til umræðu. Umræðan um málið hófst klukkan 15 í dag og stendur enn yfir. 

Stöllurnar í hlaðvarpinu Komið gott gerðu þingmálið að umræðuefni í hlaðvarpi sínu á dögunum og sögðu það „það allra leiðinlegasta þingmál sem nokkur einasta persóna hefur verið dregin í gegnum“.

Snorri Másson, þingmaður Miðflokksins, virðist vera alfarið ósammála en hann birti myndskeið á Facebook í dag þar sem hann svaraði Ólöfu Skaftadóttur og Kristínu Gunnarsdóttur, stjórnendum hlaðvarpsins.

Sagði hann málið það „allra athyglisverðasta þingmál“ sem lægi fyrir á þinginu.

Ekki gaman að standa vörð um fullveldið

Viðurkenndi hann þó að málið væri mögulega leiðinlegt en að „enginn sagði að það yrði gaman að standa vörð um fullveldi þjóðarinnar.“

Málið snýst í stuttu máli um að bætt verði ákvæði við lög um evrópska efnahagssvæðið þar sem segir að ef skýrt og óskilyrt lagaákvæði sem Ísland innleiðir samkvæmt EES-samningnum sé ósamrýmanlegt öðru almennu lagaákvæði íslenskra laga skuli hið fyrrnefnda ákvæði ganga framar.

Málið er afar umdeilt og telja einhverjir innleiðinguna stangast á við íslensku stjórnarskrána.