Sigurður Ingi Jóhannsson, formaður Framsóknarflokksins, segir frum­varp fjár­mála- og efna­hags­ráðherra um víxl­verk­un ör­orku­líf­eyr­is­greiðslna vera stjórnarskrárbrot á kostnað verkafólks. 

Þetta segir ráðherrann fyrrverandi í færslu á Facebook-síðu sinni fyrr í dag. 

Forsvarsmenn lífeyrissjóða hafa í umsögnum sínum til efnahags- og viðskiptanefndar sagt frumvarpið brjóta gegn eignarréttarákvæði stjórnarskrárinnar og telja frumvarpið að óbreyttu geta leitt til skaðabótaskyldu ríkisins. 

Frétt af mbl.is

Talið skerða eignarréttindi sjóðfélaga

Eftirlaun lækkuð með pennastriki

Sigurður Ingi segir í færslu sinni að ríkisstjórnin sé með frumvarpinu að lækka eftirlaun hjá fólki, sem borgað hafi í lífeyrissjóði alla starfsævina, með einu pennastriki. 

„Frumvarpið er keyrt áfram rétt fyrir þinglok, þvert á umsagnir hagsmunaaðila.,“ segir Sigurður Ingi jafnframt í færslu sinni. 

Sigurður Ingi tekur fram að framsóknarmenn vilji bæta kjör örorkulífeyrisþega. Hann segir þó að verði ekki gert með því að skerða áunnin, stjórnarskrárvarin réttindi fólks.