Margrét Lára Viðarsdóttir, fyrrverandi fyrirliði íslenska kvennalandsliðsins í fótbolta, fagnaði bók sinni Margrét Lára – Ástríða fyrir leiknum með glæsilegu útgáfuteiti í bókabúð Sölku við Hverfisgötu á dögunum.

Meðal gesta voru Þorsteinn Halldórsson, þjálfari íslenska kvennalandsliðsins, landsliðskonurnar fyrrverandi Ásgerður Stefanía Baldursdóttir, Dóra María Lárusdóttir og Sif Atladóttir, þjálfararnir margreyndu Pétur Pétursson og Guðni Kjartansson og Elísa Viðarsdóttir, systir Margrétar og fyrirliði Vals en fullt var út úr dyrum á viðburðinum.

„Í bókinni segir Margrét Lára sögu sína og deilir reynslu sinni og góðum ráðum. Hún gerir ferilinn upp og segir á einlægan hátt frá sigrunum og mótlætinu, samherjum og mótherjum, lífinu eftir fótboltann og síðast en ekki síst ástríðunni fyrir leiknum,“ segir meðal annars í fréttatilkynningu Sölku.

Bjarni Helgason, aðstoðarfréttastjóri íþrótta á mbl.is og Morgunblaðinu, skrifaði bókina ásamt Margréti Láru en mikil gleði einkenndi stemninguna í bókabúð Sölku eins og sjá má á meðfylgjandi myndum.