Þjár konur til viðbótar með ásakakanir á hendur Schwarzenegger

Þrjár konur til viðbótar hafa gefið sig fram og segja að Arnold Schwarzenegger, leikari og frambjóðandi til embættis ríkisstjóra í Kalíforníu, hafi beitt þær kynferðislegri áreitni. Hafa þá samtals ellefu konur komið fram með ásakanir af þessu tagi á síðustu dögum en fjórir dagar eru þar til kosningarnar fara fram í Kalíforníu.

Kona, sem starfaði sem aðstoðarleikstjóri kvikmyndarinnar Twins árið 1988, sagði við Los Angeles Times að Schwarzenegger hefði verið vanur að afklæða sig fyrir framan hana þegar hún var í hjólhýsi sínu og eitt sinn hafi hann dregið hana með sér niður á rúm.

Önnur kona, sem var staðgengill aðalleikkonunnar í sömu mynd, sagði að leikarinn hafði þrýst henni að sér og stungið tungunni upp í sig.

Þriðja konan sagði að Schwarzenegger hefði gripið í afturenda sinn og viðhaft dónalegt orðbragð þegar hún fylgdi honum inn í sjónvarpssal CNN þar sem taka átti viðtal við leikarann snemma á níunda áratugnum.

Talsmaður Schwarzeneggers neitaði fyrstu tveimur ásökunum í morgun en sagði ekkert um þá þriðju.

Los Angeles Times birti á fimmtudag frétt um að sex konur segðu að Schwarzenegger hefði áreitt þær kynferðislega. Í kjölfarið sendi leikarinn frá sér yfirlýsingu þar sem hann bað konurnar afsökunar á óviðurkvæmilegri hegðun og sagðist stundum hafa hagað sér illa á sínum yngri árum.

Maria Shriver, eiginkona Schwarzeneggers, kom manni sínum til varnar í gær og sagði að ásakanirnar snertu sig ekki vegna þess að hún þekkti eiginmann sinn. „Hann hefur beðist afsökunar og til þess þarf hugrekki."

• Blogga um frétt