Segja humar ekki finna til í sjóðandi vatni

Sumir geta ekki hugsað sé að borða humar sem soðinn …
Sumir geta ekki hugsað sé að borða humar sem soðinn er lifandi.

Norskir vísindamenn hafa komist að þeirri niðurstöðu að humar finni ekki til sársauka þegar hann er settur lifandi í sjóðandi vatn. Hefur lengi verið deilt um þetta en dýraverndunarsinnar segja að humar þjáist mikið þegar hann er soðinn og það að henda honum lifandi í sjóðandi vatn séu hreinar pyntingar.

Í niðurstöðum rannsóknarinnar, sem styrkt var af norskum stjórnvöldum og gerð af vísindamanni við háskólann í Osló, kemur fram, að humar og aðrir hryggleysingjar, eins og krabbar, sniglar og ormar finni líklega ekki til, jafnvel þótt t.d. humar brjótist um þegar hann er settur lifandi í sjóðandi vatn. „Humrar og krabbar hafa getu til að læra en það er ólíklegt að þeir finni sársauka,“ segir í niðurstöðunum. Tilgangur rannsóknarinnar var að kanna hvort ástæða væri til þess að láta lög um velferð dýra einnig ná yfir hryggleysingja en verið er að endurskoða núgildandi lög.

Líffræðingar í Maine í Bandaríkjunum hafa haldið því fram árum saman að frumstætt taugakerfi humarsins og vanþróaður heili hans séu svipuð og í skordýrum. Þegar humar sýni viðbrögð við áreiti, eins og sjóðandi vatni, séu það ósjálfráð varnarviðbrögð, ekki meðvituð viðbrögð eða merki um sársauka.

Karin Robertson, frá PETA-dýraverndunarsamtökunum, segir að norska könnunin sé hlutdræg þar sem stjórnvöld vilji ekki að fiskiðnaður landsins bíði skaða af niðurstöðum rannsókna. „Þetta er eins og þegar fyrirtæki í tóbaksiðnaðinum halda því fram að reykingar valdi ekki krabbameini,“ segir hún.

Dýraverndunarsamtök í Norfolk í Virginíu sem nefnast Ethical Treatment of Animals, berjast meðal annars fyrir því að fólk hætti að sjóða humar lifandi og hafa gefið út límmiða og bæklinga með slagorðum á borð við: „Það er sárt að láta sjóða sig. Leyfið humrum að lifa.“

Í norsku rannsókninni kemur fram að þrátt fyrir að það sé ólíklegt að krabbadýr finni sársauka, þurfi frekari rannsóknir til að komast að því. Lítil vísindaleg þekking sé til um málið.

mbl.is