Brasilíumaðurinn Jean Charles de Menezes, sem Lundúnalögreglan skaut til bana sl. föstudag, var með útrunna vegabréfsáritun en hann hafði fengið vegabréfsáritun sem námsmaður.
Breska ríkisútvarpið BBC skýrði frá þessu í dag. Fyrr í dag sagði Ahmed lávarður í samtali við BBC að hugsanlegt væri að ólöglegir innflytjendur myndu leggja á flótta ef lögregla hefði af þeim afskipti.
Ættingjar Menezes hafa sagt að þeir ætli að undirbúa málssókn á hendur lögreglunni. Menezes var skotinn þegar hann lagði á flótta undan lögreglumönnum sl. föstudag. Í ljós kom síðar, að Menezes tengdist ekki með neinum hætti tilraun sem gerð var til sprengjuárásar í Lundúnum sl. fimmtudag.