Giuseppe Pisanu, innanríkisráðherra Ítalíu, segir að Osman Hussain, sem talinn er hafa verið einn tilræðismannanna í misheppnuðu sprengjutilræðunum í Lundúnum í síðustu viku, hafi verið handtekinn í Róm í dag. Lögregla í Bretlandi handtók fyrr í dag tvo menn, sem taldir eru hafa tekið þátt í tilræðunum en fjórði maðurinn var handtekinn í Bretlandi fyrir nokkrum dögum.
„Það er sannarlega lofsvert að Sómalinn Osman Hussain, sem hefur breskt ríkisfang og er talinn vera fjórði tilræðismaðurinn í London þann 21. júlí, skuli hafa verið handtekinn fyrir nokkru í Róm," segir í yfirlýsingu Pisanu. Þá sagði hann aðgerðir lögreglunnar í Róm enn vera í gangi og að þær séu árangur alþjóðlegrar samvinnu.
Yasin Hassan Omar, 24, var handtekinn í Birmingham sl. miðvikudag en hann er grunaður um að hafa reynt að sprengja sprengju í neðanjarðarlest nálægt Warren Street í Lundúnum 21. þessa mánaðar.
Lundúnalögreglan handtók tvo menn í dag, annan í Notting Hill og hinn í Kensington. Nafn annars hefur ekki verið birt en hann er talinn hafa reynt að koma sprengja sprengju í neðanjarðarlest milli Stockwell og Oval lestarstöðvanna. Hinn er talinn vera Muktar Said Ibrahim, 27 ára innflytjandi frá Erítreu, sem kom fyrir sprengju í strætisvagni númer 26 í Hackney.
Osman Hussein, sem handtekinn var í Róm, er fæddist í Sómalíu en er með breskan ríkisborgararétt. Hann er talinn hafa reynt að sprengja sprengju í lest skammt Shepherd's Bush brautarstöðinni.