Ómetanlegar heimildir

Ómetanlegar heimildamyndir - sem teknar voru fyrir rúmum sextíu árum af greftrun jarðneskra leifa Jónasar Hallgrímssonar - eru til hjá Kvikmyndasafni Íslands, en ekki er vitað fyrir víst hvort þær hafi komið fyrir almenningssjónir áður. Liðin eru 200 ár frá fæðingardegi þjóðskáldsins, sem í dag er tileinkaður íslenskri tungu.

Myndirnar sem teknar voru af jarðsetningu beina Jónasar eru úr safni Vigfúsar Sigurgeirssonar ljósmyndara, sem var nokkurs konar hirðljósmyndari ríkisstjórnar og forsetaembættis á sínum tíma. Hann var einnig áhugamaður um kvikmyndagerð.

Bein þjóðarskáldsins Jónasar hvíldu í danskri mold í 101 ár, en um miðbik síðustu aldar var tekin ákvörðun um að fá þau heim til Íslands. Í Öldinni okkar segir að flutningur beinanna og ákvörðun um hvar þau yrðu jarðsett hafi valdið miklum deilum og blaðaskrifum. Hafi jarðneskar leifar skáldsins í fyrstu verið fluttar norður að Bakka í Öxnadal þar sem átti að jarðsetja þær, en að fyrirskipan íslenskra stjórnvalda hafi beinin hins vegar verið tekin með fógetavaldi úr Bakkakirkju og flutt aftur suður. Þar voru þau jarðsett í þjóðargrafreitnum á Þingvöllum á afmælisdegi skáldsins, 16. Nóvember 1946. Athygli vekur að kvikmynd Vigfúsar eru í lit.

Helstu ráðamenn, rithöfundar, náttúrufræðingar og aðrir mikils metnir menn voru viðstaddir jarðaför Jónasar á Þingvöllum, auk biskups og vígslubiskups. Átta alþingismenn báru kistu skáldsins úr kirkju og fóru Jónas Jónsson frá Hriflu og Ólafur Thors fremstir. Kvikmyndin er talin mjög merk heimild.

• 1 blogg um fréttina

Bloggað um fréttina

• Salvör Kristjana Gissurardóttir: Drjúptu höfði því að það er meinið, þú ert sjálfur …