Brenndu stórmarkaði í hatursáróðri gegn Bandaríkjunum

Þrír stórmarkaðir í Svíþjóð voru eyðilagðir og sá fjórði mikið skemmdur í íkveikjum í gær sem lögreglan telur að megi rekja til áróðurs gegn öllu bandarísku en í stórmörkuðunum voru seldar bandarískar vörur.

Talsmaður sænsku lögreglunnar segir að yfir 100 slökkviliðsmenn hafi verið kallaðir til að slökkva eldana í stórmörkuðunum í bænum Södertälje. Verið er að rannsaka hvort vinstrisinnaði hópurinn Global Intifada tengist málinu en hann bar ábyrgð á tveimur eldsvoðum í Södertälje í fyrra. Þá stóð hann á bak við íkveikjur í tveimur bifreiðum sem tilheyrðu danska og rússneska sendiráðinu árið 2005 auk þess sem hann reyndi að kveikja í skrifstofu pólska ræðismannsins árið 2004. Skotmörkin hafa yfirleitt verið lönd sem taka þátt í Íraksstríðinu.

Stórmarkaðirnir sem kveikt var í í gær tilheyrðu sænskum verslanakeðjum en seldu bandarískar vörur. Að sögn sænska ríkisútvarpsins dreifði Global Intifada nýlega bæklingum þar sem almenningur var hvattur til að kveikja í verslunum sem selja bandarískar vörur. Bandaríska sendiráðið í Stokkhólmi hefur verið í sambandi við lögregluna og hvetur fólk til að sýna aðgát meðan það er að versla og vera með augun opin fyrir allri grunsamlegri hegðun.

mbl.is

Bloggað um fréttina