Clinton: N-Kórea á enga vini

Hillary Clinton, utanríkisráðherra Bandaríkjanna, segir að Norður-Kórea eigi enga vini lengur, sem geti verndað þá gegn tilraunum alþjóðasamfélagsins að binda enda á kjarnorkutilraunir þeirra.

Clinton lét ummælin falla á ráðstefnu Asíuríkja, sem fram fer í Taílandi. Hún segir að það ríki víðtæk sátt um að Norður-Kórea megi ekki eignast kjarnorkuvopn.

Sendifulltrúi Norður-Kóreu á ráðstefnunni sagði að Norður-Kóreumenn myndu ekki taka þátt í sex ríkja viðræðum um kjarnorkumál landsins á nýjan leik.

Þá sagði talsmaður norður-kóreskra stjórnvalda í Pyongyang að Clinton væri „ekki gáfuð“.

Clinton segir að margir innan ASEAN, samtaka ríkja í Suðaustur-Asíu, hafi haft áhyggjur af „ögrandi hegðun“ Norður-Kóreumanna að undanförnu.

• 1 blogg um fréttina

Bloggað um fréttina

• Jón Steinar Magnússon: Hillary'us..