Hollywood styður Sea Shepherd

Sea Shepherd samtökin, sem vart geta talist til Íslandsvina, njóta stuðnings margra frægra Hollywood-stjarna.

Athygli vakti í vikunni þegar japanskur hvalveiðibátur sigldi á hraðbát samtakanna og eyðilagði hann. Samtökin hreykja sér af því að viðhafa frumlegar aðferðir við beinar aðgerðir gegn því sem þau kalla ólöglega starfsemi á heimshöfunum. Samtökin voru stofnuð árið 1977, af Paul Watson. Sökktu þau íslenskum hvalveiðiskipum í Reykjavíkurhöfn árið 1986.

Á meðal þeirra sem styrkja samtökin eru leikarinn Sean Penn og franska leikkonan Brigitte Bardot. Bæði sitja þau í ráðgjafaráði samtakanna, ásamt bandaríska leikaranum Martin Sheen og hinum írska kollega hans Pierce Brosnan.

Sheen, leikkonan Darryl Hannah og sápuóperustjarnan Richard Dean Anderson, hafa öll farið með Sea Shepherd til þess að taka þátt í aðgerðum samtakanna.

Af ríkum og frægum stuðningsmönnum samtakanna má einnig nefna Mick Jagger, Anthony Kiedis, söngvara hljómsveitarinnar Red Hot Chili Peppers auk leikaranna Christian Bale og Edwards Norton.

Fyrrverandi spjallþáttastjórnandinn Bob Barker, sem er Bandaríkjamaður, gaf samtökunum fimm milljónir dollar til þess að styrkja kaup á hvalveiðibát, fyrir fyrirhugaða eltingaleiki við japanska hvalveiðimenn á þessu ári.

Hollywood auðjöfurinn Ady Gil keypti líka fyrrnefndan hraðbát fyrir samtökin, fyrir tvær milljónir dollar.

Skip Sea Shepherd samtakanna, Farley Mowat, sést hér nálgast japanskt hvalveiðiskip. HO

• 2 blogg um fréttina

Bloggað um fréttina

• Stefán Karl Lúðvíksson: NÚ HOLLYWOOD.
• Haraldur Haraldsson: Hollywood styður Sea Shepherd///Kreppan kemur þeim ekkert við.ættum við að …