Atvinnuleysi óx í Bretlandi í janúar s.l. en úr því hafði dregið mánuðina tvo þar á undan. Atvinnuleysi hefur ekki mælst meira en nú frá því Verkamannaflokkurinn komst til valda árið 1997, samkvæmt opinberum tölum sem birtar voru í dag.
Fregnir af vaxandi atvinnuleysi þykja slæmar fyrir Gordon Brown forsætisráðherra. Þingkosningar nálgast óðum í Bretlandi og gætu þær verið haldnar í maí. Skoðanakannanir gefa til kynna að flokkur Browns muni tapa fyrir Íhaldsflokknum.
Í síðasta mánuði bættust 23.500 í hóp þeirra sem sóttu um atvinnuleysisbætur í Bretlandi. Nú er 1,64 milljón manna án atvinnu þar í landi. Þeir hafa ekki verið fleiri frá því í apríl 1997. Þetta er einnig mesta fjölgun atvinnulausra á einu bretti frá því í júlí í fyrra, að sögn bresku hagstofunnar.
Því hafði verið spáð að draga myndi úr fjölda atvinnulausra í janúar s.l. um 13.500 manns. Endurskoðaðar atvinnuleysistölur fyrir desember síðastliðinn sýna að þá fækkaði atvinnulausum um 9.600 en spáð hafði verið að þeim myndi fækka um 15.200.