Vagnar losnuðu úr norskri járnbraut

Fjórir járnbrautarvagnar losnuðu aftan úr járnbrautalestinni frá Lillehammer til Skien í Noregi nú síðdegis. Lestin var komin um 400 metra frá brautarstöðinni í Hamar þegar vagnarnir losnuðu. Fjórir fremstu vagnarnir héldu ferðinni áfram um stund áður en það uppgötvaðist að helmingurinn af lestinni varð eftir.

Talsmaður norsku járnbrautanna, NSB, sagði að tvö vagnasett sem tengd voru saman hafi losnað í sundur. Sem betur fer hafi öryggisbúnaður virkað og lausu vagnarnir stöðvast. Farþegar voru í vögnunum sem losnuðu og brá nokkuð við atvikið.

Það á ekki af norskum járnbrautum að ganga því í gær stöðvaðist öll járnbrautaumferð þar í landi þegar fjarskiptakerfi járnbrautanna bilaði. Við það þurfti að stöðva allar járnbrautir.

• 1 blogg um fréttina

Bloggað um fréttina

• stabbseddningarviddlur: Síðan hvenær eru vagnar festir við teinana