Vilja vita hvaðan fötin koma

Evrópuþingið hefur samþykkt tillögu framkvæmdastjórnar Evrópusambandsins um að skylda fataframleiðendur til að sýna upprunaland alls fatnaðar sem seldur er í aðildarlöndum sambandsins.

Markmiðið með tillögunni er að tryggja að viðskiptavinir verslana geti gengið úr skugga um hvort fatnaðurinn sé framleiddur í Evrópu eða í löndum á borð við Kína eða Pakistan.

„Viðskiptavinurinn hefur rétt til að vita hvaðan varan kemur,“ sagði hollenski þingmaðurinn Toin Manders.

Tillagan verður nú lögð fyrir fulltrúa aðildarlandanna 27 til samþykktar. Svipuð tillaga, sem náði til alls varnings, ekki aðeins fatnaðar, náði ekki fram að ganga fyrir fimm árum vegna ágreinings milli aðildarlanda.

Verði tillagan samþykkt er breytingin talin auðvelda litlum og meðalstórum fyrirtækjum að halda áfram að framleiða fatnað í Evrópu, frekar en að flytja framleiðsluna til þróunarlanda, þar sem vinnuaflið er ódýrara. Slíkar reglur um að sýna beri upprunaland fatnaðar hafa verið settar í löndum á borð við Bandaríkin, Kanada og Japan.

• 1 blogg um fréttina

Bloggað um fréttina

• Sverrir Einarsson: Þetta verður bara falið.