Erlent | mbl | 5.12.2010 | 19:53

Búsáhaldabylting á Írlandi

Óánægja ríkir meðal almennings á Írlandi vegna neyðarsamkomulags við AGS og ESB. CATHAL MCNAUGHTON

„Á Íslandi hópaðist fólk saman á götum úti og barði potta og pönnur. Þeir létu bankana sína falla og veltu ríkisstjórninni úr sessi. Við þurfum að fara sömu leið,“ segir einn skipuleggjenda mótmæla í Dublin.

Í frétt á vef írska blaðsins Irish Times er greint frá mótmælasamkomu sem sögð er byggð á „potta- og pönnuhreyfingunni“ á Íslandi. Mótmælin, sem fóru friðsamlega fram, voru skipulögð á samskiptavefnum Facebook.

Mikil reiði er í landinu vegna efnahagsástandsins. Síðla árs 2008 hétu stjórnvöld því að ábyrgjast allar skuldbindingar írskra bankastofnana, en sú ákvörðun virðist nú vera að koma þeim í koll. Skipuleggjandinn, sem ekki vildi láta nafn síns getið segir einkabanka eiga að bera ábyrgð á eigin skuldbindingum.

Nýverið sömdu Írar um lán frá Alþjóða gjaldeyrissjóðnum og Evrópusambandinu. Fyrirséð er að vaxtabyrðin af láninu verðu Írum afar þung, sem þurfa jafnframt að skera gríðarlega niður í ríkisfjármálum.

Önnur potta- og pönnumótmæli hafa verið boðuð næstkomandi þriðjudag.