Drykkfelldur og kvensamur soldán

Tyrkneska fjölmiðlaeftirlitið hefur áminnt einkarekna sjónvarpsstöð, Show TV, við vegna sýningar á þáttum sem sýna soldán nokkurn sem drykkfelldan kvennabósa.

Í yfirlýsingu eftirlitsins segir að  Show TV hafi ekki virt rétt soldánsins til einkalífs. Soldáninn var uppi á árunum 1520 - 1566 og hét Suleiman hinn stórkostlegi.

Umræddur þáttur heitir „Stórkostleg öld“ og þar er líferni soldánsins og hirðar hans lýst.

Um 75.000 manns munu hafa kvartað vegna þessa og stöðinni hefur verið gert að biðjast opinberlega afsökunar.

Fjölmiðlaeftirlitið hefur vald til að ritskoða sjónvarpsþáttinn, láti stöðin sér ekki segjast, en næsti þáttur um soldáninn mun vera á dagskrá í kvöld.

• 2 blogg um fréttina

Bloggað um fréttina

• Sigríður Sigurðardóttir: Sármóðgaður...
• Kristinn Sigurjónsson: Skyldi íslenska fjölmiðlaeftirlitið verða frábrugðið því Tyrknesa