Fannst látinn í byrgi sínu

Lögreglumenn Washingtonríki fundu í dag lík Pauls Kellers sem grunaður er um að hafa myrt eiginkonu sína og dóttur á táningsaldri. Keller hafði komið sér upp byrgi á fjallasvæði fjörutíu kílómetrum frá Seattle. Þar fannst lík hans og virðist sem Keller hafi svipt sig lífi.

Keller hafði verið leitað síðan á sunnudag en þá fundust lík eiginkonu hans og dóttur á heimili þeirra. Ekki er vitað um ástæðu þess að Keller framdi ódæðið.

Við rannsókn lögreglu kom í ljós að Keller hafði í um átta ár unnið að byrgi sínu sem nær um sex metra inn í fjallshlíðina. Sérsveitarmenn köstuðu fyrst inn í byrgið táragasi og sprengdu sér svo leið inn í það.

Talið er að Keller hafi svipt sig lífi með byssu fyrir nokkrum dögum.

• Blogga um frétt