Hafna áfrýjun Abu Qatada

Mannréttindadómstóll Evrópu hefur hafnað beiðni íslamska harðlínuklerksins Abu Qatada um að taka mál hans til umfjöllunar en bresk stjórnvöld vilja vísa honum úr landi til Jórdaníu þar sem hans bíða réttarhöld.

Ákvörðun dómstólsins þýðir að Bretar geta unnið að brottvísun hans en Abu Qatada var árið 1999 sakfelldur að sér fjarstöddum í Jórdaníu fyrir að eiga hlutdeild í hryðjuverkaárásum. Verði hann sendur þangað verður réttað aftur yfir honum. 

Bretar hafa lengi viljað framselja klerkinn til Jórdaníu en um tíma var hann talinn vera hægri hönd Osama bin Ladens og telja bresk stjórnvöld hann ógna þjóðaröryggi Bretlands en ítrekað hefur verið komið í veg fyrir það þar sem Abu Qatada telur að hann verði pyntaður í Jórdaníu. Hann fékk hæli í Bretlandi árið 1993. 

Abu Qatada var handtekinn í Bretlandi í apríl og leitaði hann í kjölfarið  til Mannréttindadómstólsins um að mál hans yrði tekið fyrir þar sem framsal hans brjóti gegn mannréttindasáttmála Evrópu. Á það fellst dómurinn hins vegar ekki á og því var beiðni hans hafnað í dag. 

• Blogga um frétt