Að minnsta kosti 55 létust í tveimur sjálfsvígsárásum í höfuðborg Sýrlands, Damaskus, í dag. 372 eru særðir, samkvæmt upplýsingum frá innanríkisráðuneytinu. Áður hafði ráðuneytið sagt að 40 hefðu látist í árásunum.
Tilræðismennirnir höfðu komið yfir einu tonni af sprengiefni í bifreiðum sínum.
Sýrlensk mannréttindasamtök segja mannfallið enn meira en opinberar tölur herma. Segja þau að 59 hafi látist og meðal þeirra séu almennir borgarar.
Sprengjurnar sprungu á svipuðum slóðum í nágrenni húsa sem hýsa starfsemi leyniþjónustu landsins. Húsin eru rústir einar líkt og flest hús í nágrenninu.