Írönskum karlmanni, sem gerði tilraun til að nauðga konu í bænum Slagelse í Danmörku, varð ekki kápan úr því klæðinu, því konan beit hraustlega í getnaðarlim hans er hann reyndi að koma fram vilja sínum. Auk þess var hann í dag dæmdur til fangelsisvistar, greiðslu sektar og verður síðan vísað af landi brott að afplánun lokinni.
Konan var á ferð í Slagelse er maðurinn réðst að henni og hrinti henni inn í húsasund í þeim tilgangi að nauðga henni. Hún komst undan honum með fyrrgreindum hætti og hafði þegar samband við lögreglu.
Maðurinn fór að þessu búnu á diskótek og kvartaði þar sáran við vin sinn vegna atburðanna. Vinurinn tilkynnti lögreglu síðan atvikið.
Maðurinn var í dag dæmdur í héraðsdóminum í Næstved til eins árs og níu mánaða fangelsisvistar og að greiða konunni 54.000 danskar krónur í skaðabætur. Hann neitar allri sök og hefur áfrýjað dómnum.