Hrossakjötshneykslið hefur beint sjónum að víðtækara svindli við merkingu matvæla. Segir franska blaðið Le Figaro að í kjölfar þess sé fiskur undir smásjánni, ekki síst eftir að umfangsmikil bandarísk rannsókn hafi leitt í ljós víðtækt svindl með þá matvöru.

Á árunum 2010 til 2012 stóð óháð bandarísk stofnun, Oceana, fyrir umfangsmikilli alþjóðlegri rannsókn á sjávarafurðum, uppruna þeirra og merkingu. Rannsökuð voru 1200 sýnishorn frá 674 sölustöðum í 21 landi til að grafast fyrir um hvort tilgreindur fiskur væri í raun í innihaldinu. Með öðrum orðum hvort matvælin væru rétt merkt.

Niðurstaða ADN-rannsókna leiddi í ljós að þriðjungur var ranglega merktur og jafnvel að ekki hafði verið farið að áður útgefnum tilmælum bandarískra heilbrigðisyfirvalda.   

Í 120 tilvikum sem sagt var að verið væri að kaupa fisktegundina Red Snapper reyndust aðeins 7 sýnishornanna ósvikin. Og í annarri rannsókn árið 2011 kom í ljós, að 28% þorsks frá Írlandi var ranglega merktur. Í raun var þar á ferð gæðaminni og ódýrari fiskur.

Við Miðjarðarhafið er sverðfiskur vinsæll fiskréttur en þegar þeir panta hann eru allar líkur á að þeir fái hámeri. Þótt þessum tveimur tegundum svipi nokkuð saman, að sverðinu frátöldu, er sá síðarnefndi miklu ódýrari.

Í blaðinu er haft eftir sérfræðingi í sjávarlíffræði, að með nákvæmlega sama hætti og í tilviki íblandaðs nautakjöts sé hægt að beita svindli við framleiðslu hálf- og fullbúinna fiskrétta. Þegar til dæmis sé um að ræða fiskfingur og fisksteikur megi hæglega drýgja fiskinn með ódýrari fiski.

Það er ekki allt sem sýnist sem úr hafinu kemur. Hér syndir hafmeyja í sjávardýrasafni í Sao Paulo í Brasilíu. mbl.is/afp

Red Snapper var sjaldnast Red Snapper. mbl.is/AFP

Tengdar fréttir

Hrossakjötshneyksli

Neitar að hafa vitað að nautið var hross

• 65 handteknir vegna hrossakjötshneykslis
• Hrossakjötssmyglarar ákærðir
• Upprættu umfangsmikið smygl á hrossakjöti
• Bökurnar rannsakaðar upp til agna

» Fleiri tengdar fréttir

• Blogga um frétt