Eldri karlmenn noti kvenreiðhjól

Eldri borgarar, bæði konur og karlar, ættu að nota kvenreiðhjól til þess að draga úr slysum á meðal þeirra þegar þeir fara af reiðhjólum samkvæmt nýrri skýrslu frá VTI, sænskri rannsóknarstofnun á sviði samgöngumála.

Fram kemur á fréttavefnum Thelocal.se að fjórir af hverjum tíu sem slasast alvarlega eða láta lífið á ökutækjum sem flokkast sem reiðhjól séu eldri en 65 ára. Slysin verða gjarnan á litlum hraða eða þegar eldri borgararnir eru að fara á hjólin eða af þeim. Gjarnan er um að ræða mjaðmaáverka.

Vísindamenn við stofnunina hafa fyrir vikið komist að þeirri niðurstöðu að það væri betra fyrir karlmenn að notast við kvenreiðhjól, með lægri slá, þegar aldurinn færist yfir. Haft er eftir Önnu Niska hjá VTI að sláin á karlareiðhjólum þvælist fyrir eldri körlum og að þeir eigi erfitt með að lyfta sér yfir hana.

Skýrsla stofnunarinnar nær til áranna 2007-2011 en samkvæmt henni urðu á þeim tíma 125 banaslys og 1.275 alvarleg meiðsl á fólki vegna reiðhjólanotkunar. Þar af urðu meiðsl á fólki í 119 skipti þegar farið var á reiðhjól eða af þeim.

• 2 blogg um fréttina

Bloggað um fréttina

• Ómar Ragnarsson: Má ekki nefna orðin gamalt eða elli, þau eru feimnismál.
• Vilberg Helgason: Aldraðir á hjólum...