Ráðist var á tvo meðlimi pönkbandsins Pussy Riot á veitingastað McDonalds í Rússlandi í dag, en hópur ungra manna réðst á þær Nadesjdu Tolokonnikovau og Mariu Alyokhinu. Konurnar eru með höfuðáverka og brunasár eftir árásina. Mennirnir voru vopnaðir grænum sótthreinsivökva, piparspreyi og vopnum.

Þetta segir Pyotr Verzilov, eiginmaður Tolokonnikovau, í samtali við AFP-fréttastofuna en hljómsveitin sendi einnig frá sér myndskeið eftir árásina. Þar má sjá mennina trufla konurnar þar sem þær sátu á veitingastaðnum og í lokin konurnar tvær, grænar í framan eftir vökvann sem mennirnir skvettu á þær.

Einn mannanna hélt á spjaldi með skilaboðunum: „Skítugu hórur, farið úr borginni,“. Lögfræðingur hljómsveitarinnar, Yevgeny Gubin, sagði að árásarmennirnir hefðu einnig hent hlutum úr málmi í konurnar.

Þetta er ekki í fyrsta skipti sem ráðist hefur verið á konurnar tvær eftir að þeim var sleppt úr fangelsi í desember. Þær sátu báðar í rússneskum fangabúðum í tæp tvö ár að hafa flutt pönkmessu í kirkju í Moskvu þar sem þær ákölluðu Maríu guðsmóður og báðu hana um að losa Rússland við Vladimir Pútín forseta. Þær voru látnar lausar í desember, þremur mánuðum áður en afplánun þeirra átti að ljúka.

Tolokonnikova deildi læknisvottorði á Twitter þar sem kom fram að hún væri brunnin á augum, andliti og höndum eftir árásina í dag. Sauma þurfti enni Alyokhinu og fékk hún einnig heilahristing. 

Nadesjda Tolokonnikova og Maria Alyokhina, meðlimir rússnesku pönksveitarinnar Pussy Riot EPA

Tengdar fréttir

Pussy Riot

Íslensk liðskona Pussy Riot eftirlýst

• Liðsmenn Pussy Riot öðlast íslenskan ríkisborgararétt
• Neita að gefa upplýsingar um neyðarvegabréf
• Pussy Riot til landsins í nóvember
• Liðsmenn Pussy Riot fá hæli í Svíþjóð

» Fleiri tengdar fréttir

• Blogga um frétt