Fjölmargir stjórnarandstæðingar í Taílandi fagna setningu nýrra herlaga í landinu. Þeir segjast þó ætla að halda áfram baráttu sinni við að koma núverandi ríkisstjórn landsins frá völdum.
Herlögin tóku í gildi í gærkvöldi. Þau auka völd hersins til muna en forsvarsmenn hans segja að gripið sé til lagasetningarinnar til þess að vernda lög og rétt í landinu.
Í tilkynningu frá bandarískum yfirvöldum kemur fram að herlögin megi einungis gilda tímabundið og ekki draga úr lýðræði í landinu.
Stjórnmálakreppa hefur ríkt í Taílandi um nokkurra mánaða skeið og fyrr í mánuðinum var Yingluck Shinawatra, fyrrverandi forsætisráðherra Taílands, rekin frá völdum.