Lögreglan stóð aðgerðalaus hjá

Eiginmaður konunnar og aðrir ættingja sjást hér flytja lík konunnar …
Eiginmaður konunnar og aðrir ættingja sjást hér flytja lík konunnar á brott í fyrradag. AFP

Eiginmaður pakistanskrar konu sem var grýtt til dauða um hábjartan dag fyrir utan dómshús í borginni Lahore segir að lögreglumenn hafi orðið vitni að árásinni en án þess þó að aðhafast nokkuð til að koma konunni til aðstoðar.

Ættingjar Farzana Parveen, sem var 25 ára, myrtu hana á þriðjudag vegna þess að hún hafði gifst manni sem hún elskaði. Perveen var þá komin þrjá mánuði á leið.

„Við kölluðum á hjálp; enginn hlustaði,“ sagði eiginmaður hennar, Muhammad Iqbal, í samtali við breska ríkisútvarpið.

Fréttaskýrendur segja að mörg hundruð svokölluð sæmdarmorð á konum séu framin á hverju ári í Pakistan. 

Navi Pillay, mannréttindastjóri Sameinuðu þjóðanna, segir að þetta hafi verið hræðilegur atburður og hún hvatti ríkisstjórn Pakistans til að grípa til viðeigandi aðgerða til að sporna við svona árásum. 

„Ég vil ekki einu sinni notað orðið „sæmdarmorð“ því það er engin sæmd fólgin í því að myrða konur á þennan máta,“ bætti hún við.

Iqbal gagnrýnir lögreglun harðlega fyrir að hafa ekkert gert til að grípa inn í og stöðva árásina. Þetta sé bæði skammarlegt og miskunnarlaust.

mbl.is