Egypskur dómstóll staðfesti í dag dauðadóm yfir 183 liðsmönnum Bræðralags múslima, þar á meðal Mohamed Badie æðsta trúarleiðsögumanni bræðralagsins. Þinghaldið tók aðeins um stundarfjórðung en þeir sem líflátnir verða voru sakfelldir fyrir aðild að morði og morðtilraun á lögreglumönnum í Minya héraði þann 14. ágúst í fyrra.
Sami dómstóll dæmdi í apríl 683 liðsmenn Bræðralags múslima til dauða vegna sama máls. Í dag mildaði dómstóllinn hins vegar refsingu fjögurra í lífstíðarfangelsi og sýknaði 496 þeirra sem upphaflega voru dæmdir.
Í mars voru 529 stuðningsmenn Mohameds Morsis, sem sviptur var embætti forseta 3. júlí í fyrra, dæmdir til dauða, en í apríl voru refsingar 492 þeirra mildaðar úr dauðarefsingu í lífstíðarfangelsi í flestum tilvikum.
Þeir sem dæmdir voru til dauða í dag voru flestir ákærðir fyrir aðild að morði og morðtilraun á lögreglumönnum í Minya héraði þann 14. ágúst í fyrra þegar lögregla drap hundruð stuðningsmanna Morsis í átökum í Kaíró.
Egypsk yfirvöld hafa gengið hart fram gegn Bræðralagi múslíma eftir að Mohamed Morsi var steypt af stóli. Þúsundir manna hafa verið handteknar og þar á meðal eru nánast allir pólitískir forustumenn þeirra.