Ekki ákærður fyrir „afbrigðilega“ hegðun

Teikning sem sýnir Dominique Strauss-Kahn við réttarhöldin í Lille.
Teikning sem sýnir Dominique Strauss-Kahn við réttarhöldin í Lille. AFP

Dominique Strauss-Kahn, fyrrverandi framkvæmdastjóri Alþjóðagjaldeyrissjóðsins, er ekki sáttur við að einblínt sé á kynlífshegðun hans í réttarhöldum sem fara nú fram í Lille í Frakklandi. Strauss-Kahn er sakaður um, ásamt 13 öðrum, aðild að  stór­felldu hór­mangi.

Strauss-Kahn er sakaður um að hafa aflað vændis­k­venna fyr­ir vænd­is­hring sem var starfrækt­ur á hót­eli í Lille.

Hann sagði að hann hefði ekki verið ákærður fyrir „afbrigðilega“ hegðun. 

Strauss-Kahn sagði ennfremur, að það væri fáránlegt að halda því fram, eins og fram hefði komið við réttarhöldin, að kynferðislegur áhugi hans, m.a. á sódómískum athöfnum, hefði leitt til þess að hann hefði leitað til vændiskvenna.

Annar dagur réttarhaldanna fór fram í dag. Þar var m.a. rætt um kynlífsveislur sem Strauss-Kahn sótti í París, Brussel og í Washington. Markmiðið er að reyna varpa ljósi á það hvort Strauss-Kahn hefði komið að því að afla vændiskvenna í veislurnar. 

Vændi er löglegt í Frakklandi. Hins vegar er refsivert að hvetja til eða koma að skipulagningu slíkrar starfsemi. Brotið gæti varðað allt að 10 ára fangelsi. 

Strauss-Kahn, sem er 65 ára gamall, og þótti um tíma líklegur sem næsti forseti Frakklands, neitar því að hann hafi vitað að konurnar sem voru í kynlífsveislunum hafi verið vændiskonur. Hann taldi að þær hefðu verið þarna af fúsum og frjálsum vilja.

Hann heldur því fram að það hefði fylgt því of mikil áhætta fyrir mann í hans stöðu að kaupa vændi, en hann benti á að hann hefði verið upptekinn við að bjarga heiminum frá fjármálahruni sem ætti sér engin fordæmi.

mbl.is
EIGUM ALLSKONAR STIGA Á LAGER
Sjá fjölmargar gerðir á: http://www.sogem-sa.com/stairs Sími 615 1750 Sjá einni...
Perlur sem ekki þarf að strauja !!
Nýtt á Íslandi, perlur sem ekki þarf að strauja, einungis sprauta vatni á og þær...
Skápur til sölu.
Furuskápur hæð,2.m breidd 0,71meter. 8000.kr. uppl.8691204....