Kjörstjórn breska Verkamannaflokksins þurfti að lengja frestinn til þess að skrá sig sem kjósanda í leiðtogakjörinu sem hefst á fimmtudaginn um þrjár klukkustundir eftir að tölvukerfið hrundi vegna mikillar aðsóknar.
If you are trying to register as a supporter and are experiencing difficulties, the deadline has been extended to 3pm if you want to vote.
— The Labour Party (@UKLabour) August 12, 2015
Samkvæmt The Telegraph var það hvatning eins frambjóðandans, Jeremys Corbyns, til stuðningsmanna sinna í gegnum samfélagsmiðla sem leiddi til þess að vefsíðan fór á hliðina. Var fresturinn því lengdur frá hádegi í dag til klukkan 15 eftir að fjöldi kvartana bárust flokknum.
Corbyn þykir sigurstranglegastur á meðal sérfræðinga og veðbanka. Stuðullinn á að Corbyn fari með sigur af hólmi er 2/5 hjá Bet365. Næst á eftir honum kemur Andy Burnham með 7/2. Í skoðanakönnun sem framkvæmd var á meðal kjósenda leiðtogakjörinu á dögunum 6.-10. ágúst er Corbyn með 53% fylgi, Burnham með 21% og Yvette Cooper með 18%.
Kosningin hefst þann 14. ágúst og stendur til 10. september. Úrslitin verða svo tilkynnt þann 12. september á sérstökum landsfundi.
Kosið verður í fyrsta skiptið eftir nýju kosningakerfi. Í gamla kerfinu vógu atkvæði þingmanna flokksins (þjóðþings og Evrópuþings) 1/3, atkvæði almennra flokksmanna 1/3 og atkvæði meðlima verkalýðsfélaganna sem eiga aðild að Verkamannaflokknum 1/3.
Með nýju reglunum hafa öll atkvæði sama vægi og meðlimir verkalýðsfélaga verða að skrá sig í flokkinn til þess að geta kosið.