Erlent | mbl | 27.8.2015 | 16:13

Holmes dæmdur í lífstíðarfangelsi

James Holmes var dæmdur í lífstíðarfangelsi. AFP

Fjöldamorðinginn James Holmes sem myrti 12 manns á miðnætursýningu á Batman kvikmynd árið 2012 var í gær formlega dæmdur í lífstíðarfangelsi án möguleika á reynslulausn. Dómarinn Carlos A. Samour hafði ekki kost á því að dæma Holmes til dauða þar sem kviðdómur komst ekki að einróma niðurstöðu um það fyrr í mánuðinum.

20. júlí 2012 gekk Holmes inn á miðnæturforsýningu Batman myndarinnar The Dark Knight Rises, vopnaður riffli, haglabyssu og skammbyssu. Að sögn saksóknara í málinu var Holmes með háa raftónlist í eyrunum á meðan árásinni stóð „til þess að heyra ekki öskrin“.

Kviðdómur, sem samanstóð af níu konum og þremur körlum, hafnaði því í síðasta mánuði að Holmes hafði verið löglega geðveikur þegar hann myrti tólf manns í kvikmyndahúsi í Colorado í júlí 2012 og særði 70. Holmes var dæmdur sekur í síðasta mánuði en verjendur hans höfðu reynt að halda því fram að hann hefði ekki verið heill á geði þegar hann framdi árásina. Saksóknarar kröfðust þess við réttarhöldin að Holmes yrði tekinn af lífi.

Fyrr í þessum mánuði var það síðan tilkynnt að Holmes fengi að lifa en yrði í fangelsi til æviloka. Til að dæma mann til dauða í Colorado þarf kviðdómur að komast að einróma niðurstöðu og tókst það ekki.

Að mati saksóknara var árásin augljóslega skipulögð þar sem Holmes hafi safnað saman vopnum í marga mánuði.

Ættingjar fórnarlamba Holmes voru margir ósamála um örlög morðingjans. Sumir vilja ekki að hann verði tekinn af lífi, enda tekur það oft mörg ár með tilheyrandi áfrýjunum. Margir vilja að málinu ljúki sem fyrst og líta á lífstíðarfangelsisdóm sem bestu leiðina til þess.

Holmes hefur verið greindur með geðklofa og gæti endað á geðsjúkrahúsi eftir að hafa afplánað einhvern hluta dómsins samkvæmt miðlum vestanhafs.