„Ég er barnaníðingur“

Réttarhald yfir þrítugum manni sem er ákærður fyrir barnaníð gagnvart 17 börnum á leikskóla í Tromsø hefst á morgun. Maðurinn segist sjálfur vera barnaníðingur. 

Maðurinn var handtekinn í vinnunni þann 6. maí í vor, nokkrum klukkustundum eftir að foreldrar höfðu samband og lýstu áhyggjum sínum vegna mannsins.

Í gæsluvarðhaldsúrskurði yfir manninum frá undirrétti í Hålogaland kemur fram að maðurinn hafi sagt við yfirheyrslur hjá lögreglu að hann væri barnaníðingur.

Maðurinn hefur setið í gæsluvarðhaldi frá því hann var handtekinn og í einangrun að eigin ósk því fangelsismálayfirvöld treystu sér ekki til þess að tryggja öryggi hans innan veggja fangelsis öðruvísi.

Svo virðist sem brotin nái allt aftur til ársins 2012 og um ítrekuð brot sé að ræða gagnvart þremur til fimm börnum.

Maðurinn hafði tekið nektarmyndir af 16 af börnunum 17 en alls fundust um 40 myndir í farsíma hans. Eins fundust útprentaðar myndir af börnunum á heimili hans og ofbeldismyndskeið sem tengjast óþekktum börnum.

Alls hefur verið rætt við 55 börn í tengslum við rannsóknina og saksóknari mun leggja fram þrettán réttarrannsóknir á átta börnum við réttarhöldin, samkvæmt frétt VG.

Tveir geðlæknar sem önnuðust geðrannsókn á hinum ákærða segja að hann sé sakhæfur en hann á yfir höfði sér allt að 21 árs fangelsi fyrir brot sín.

Uppfært 14:13

Upphaflega var talað um í norskum fjölmiðlum að maðurinn hefði brotið gegn 19 börnum. Á vef Verdens Gang hefur tölunni verið breytt, en um er að ræða 17 börn. Þetta leiðréttist hér með.

Frétt VG

• Blogga um frétt