Jólageitin brunnin

Gävle geitin
Gävle geitin AFP

Loksins tókst að kveikja í Gävle geitinni í Svíþjóð en það gerist yfirleitt alltaf fyrir jól. Svo bar til í ár að ekki var kveikt í henni fyrr en í nótt. Í fyrra tókst hins vegar ekki að kveikja í henni en á þeim 49 árum sem jólageitin hefur verið sett upp hefur verið kveikt í henni í 34 skipti.

En brennuvargurinn náðist og gistir fangageymslu í Gävle. Að sögn lögreglu var tilkynnt um að kveikt hafi verið í strágeitinni sem stóð á Slottstorginu um þrjú í nótt. Brennuvargurinn var handtekinn skömmu síðar dauðadrukkinn, með lambhúshettu á hausnum, haldandi á dagblöðum og kveikjara auk þess sem hann angaði ekki bara af áfengi heldur einnig bensíni.

Myndskeið sem tekin voru af brennuvarginum sem er um tvítugt sýna að það hefur kviknað í fötum hans þegar hann reyndi að kveikja í geitinni. Í morgun hafði ekki enn tekist að yfirheyra hann vegna þess hve ölvaður hann var. Félagi hans hefur ekki fundist.

Jóla­geit­ur eru al­geng­ar í Svíþjóð en eng­in þeirra er jafn fræg og strá­geit­in í Gävle sem er 13 metr­ar á hæð.

Frétt Expressen

Jólageitin hefur hins vegar sett inn afsökunarbeiðni á Twitter vegna þess hversu snemma hún yfirgefur borgina í ár en lofar að snúa endurnærð til baka að ári - á fimmtugsafmælinu.

mbl.is