Til stendur að Atlantshafsbandalagið (NATO) sendi fjögur fjölþjóðleg herfylki til Eistlands, Lettlands, Litháens og Póllands vegna vaxandi hernaðarógnar frá Rússlandi. Þetta upplýsti Jens Stoltenberg, framkvæmdastjóri NATO, á blaðamannafundi í gær.

Fram kom á fundinum að endanleg ákvörðun í þessum efnum yrði tekin á leiðtogafundi NATO í Varsjá, höfuðborg Póllands, í byrjun næsta mánaðar sem og um það hversu fjölmenn herfylkin verða og hvaða ríki leggi fram mannafla og búnað til þeirra.

Gert er ráð fyrir að aðildarríki NATO skiptist á að manna herfylkin en tryggt verði að alltaf verði fullskipuð fjögur herfylki í ríkjunum fjórum á meðan á þeim þurfi að halda. Um framvarðsveitir er að ræða en að baki þeim verða um 40 þúsund manna viðbragðssveitir NATO.

Stoltenberg upplýsti ennfremur að á síðasta ári hefðu samanlögð fjárframlög aðildarríkja NATO, að Bandaríkjunum undanskildum, til varnarmála sem hlutfall af landsframleiðslu verið jákvæð um 0,6% sem væri í fyrsta sinn sem það gerðist á undanförnum árum.

Ríkin væru farin að fjárfesta á ný í málaflokknum í stað þess að skera niður. Stefnt væri að 2% í þeim efnum en Bandaríkin hafa lengi verið í eða yfir því viðmiði. Framkvæmdastjórinn sagði þetta afar jákvætt og í samræmi við markmið bandalagsins. Reiknað væri með að á þessi ári yrðu framlögin 1,5% að meðaltali.

Tengdar fréttir

Úkraína

Selenskí: Hefðum varist árásinni með betra loftvarnarkerfi

• Segja yfir 50 þúsund hermenn fallna
• Þórdís hitti forsætisráðherra Úkraínu í Keflavík
• Úkraína og Lettland gera tvíhliða öryggissamning
• Fjórir látnir eftir flugskeytaárás

» Fleiri tengdar fréttir

• Blogga um frétt