Aldrei hafa fleiri jarðarbúar verið á flótta eða á hrakningum vegna stríðsátaka að því er fram kemur í skýrslu frá Flóttamannahjálp Sameinuðu þjóðanna. Stofnunin áætlar að 65,3 milljónir manna hafi í lok síðasta árs flokkast sem flóttamenn, hælisleitendur eða verið á hrakningi vegna átaka, og er það fimm milljónum fleiri en árið á undan.

Fjöldinn jafngildir því að einn af hverjum 113 jarðarbúum sé á flótta eða í leit að hæli. Fréttavefur BBC hefur eftir Filippo Grandi, framkvæmdastjóra Flóttamannahjálparinnar, að vaxandi kynþáttahatur í Evrópu á sama tíma og álfan reyni að takast á við mesta straum flóttamanna frá síðari heimsstyrjöldinni, sé einnig áhyggjuefni.

Í ársskýrslu Flóttamannahjálparinnar kemur fram að þetta sé í fyrsta skipti sem meira en 60 milljónir manna eru á flótta eða í leit að hæli, en alþjóðadagur flóttamanna er í dag.

Yfir helmingur flóttamanna og hælisleitenda kemur frá aðeins þremur löndum, Sýrlandi, Afganistan og Sómalíu.

Þótt mikil athygli beinist nú að flóttamannavandanum í Evrópu, dvelja um 86% allra flóttamanna og hælisleitanda í ríkjum sem búa við meðalgóðan eða lakan efnahag.

Tyrkland er það ríki sem hýsir hvað flesta flóttamenn, en 2,5 milljónir flóttamanna og hælisleitenda dvelja nú í Tyrklandi. Þau ríki sem fylgja í kjölfarið eru Pakistan og Líbanon.

Rúmlega ein milljón flóttamanna kom sjóleiðina til Evrópu í fyrra, samkvæmt upplýsingum frá Alþjóðastofnun innflytjendamála (IOM), þó aðrar stofnanir telji fjölda þeirra sem koma sjóleiðina vera mun meiri.

Flestir flóttamenn vilja fá hæli í efnuðum ríkjum á borð við Þýskaland og Svíþjóð og endurspeglast þetta í tölum Flóttamannahjálparinnar fyrir hælisumsóknir. Þannig sækja flestir um hæli í Þýskalandi, Bandaríkjunum og Svíþjóð.

Tölfræðin

• 65.3milljónir teljast flóttamenn, hælisleitur eða á hrakningu vegna átaka
• Það jafngildir einum af hverjum 113 jarðarbúum
• 12.4 milljónir hröktust frá heimili sínu vegna stríðsátaka eða ofsókna árið 2015  
•  24 flúðu á hverri mínútu 2015
• 54% flóttamanna koma frá aðeins þremur löndum, Sýrlandi, Afganistan og Sómalíu
• Helmingur allra flóttamanna eru börn undir 18 ára aldri

Tengdar fréttir

Á flótta

Ástralska ríkið samdi við vafasöm fyrirtæki

• ESB herðir löggjöf um málefni flóttafólks
• 41 flóttamanns saknað
• Móðir og ungbarn drukknuðu
• Tekur á móti allt að 140 einstaklingum í viðkvæmri stöðu

» Fleiri tengdar fréttir

• Blogga um frétt