Bandaríski sundkappinn Ryan Lochte bað í nótt brasilísku þjóðina afsökunar á því að hafa ýkt frásögn sína af vopnuðu ráni sem hann og þrír félagar hans í bandaríska sundliðinu urðu fyrir á meðan á Ólympíuleikunum í Ríó stóð.
Hann neitaði því þó að hafa logið að öllu leyti.
Eins og kunnugt er hélt Lochte því fram að félagarnir fjórir hefðu verið rændir á bensínstöð um síðustu helgi.
Upptökur úr öryggismyndavél sögðu hins vegar aðra sögu. Kom í ljós að mennirnir höfðu unnið skemmdir á salerni á bensínstöðinni og lent í átökum við öryggisvörð á staðnum, sem hringdi síðan í lögregluna.
„Ég var ekki að ljúga að ákveðnu leyti,“ sagði Lochte í samtali við brasilísku sjónvarpsstöðina Globo TV í nótt. Hann hefði aðeins „stórlega ýkt“ það sem hefði komið fyrir hann.
Hann sagðist jafnframt vera leiður yfir málinu. „Brasilía á þetta ekki skilið.“
Alþjóðaólympíunefndin hefur skipað sérstaka rannsóknarnefnd til þess að skoða málið og háttsemi íþróttamannanna ofan í kjölinn.
Það var á sunnudagsmorgun, fyrir réttri viku, sem móðir Lochte sagði USA Today að sonur hennar hefði verið rændur af vopnuðum mönnum þá um nóttina.
Skömmu síðar lýsti bandaríski sundkappinn því nákvæmlega fyrir fréttamanni NBC hvernig hópur manna sem létust vera brasilískir lögreglumenn hefði stoppað hann og félaga hans þegar þeir voru farþegar í leigubíl og rænt þá.
Brasilíska lögreglan sagði hins vegar daginn eftir að ósamræmi væri í framburði mannanna.
Á miðvikudag voru tveir sundmannanna, Gunnar Bentz og Jack Conger, yfirheyrðir á flugvellinum í Ríó. Þeim var þó að lokum leyft að fara úr landi.
Þriðji félaginn, Jimmy Feigen, samþykkti að greiða ellefu þúsund dali til brasilískra góðgerðarsamtaka.