Bandaríski stjórnmálamaðurinn Jessica Farrar hefur lagt fram frumvarp þess efnis að karlmenn verði sektaðir um 100 Bandaríkjadali, rúmlega 11 þúsund íslenskar krónur, fyrir að stunda sjálfsfróun án þess að tilgangurinn sé að skapa líf.
Farrar er Demókrati en með þessu vill hún leggja áherslu á fáránleikann vegna fóstureyðingarlaga vestanhafs. Þess vegna vill hún að „öll losun sem á sér stað annars staðar en við samfarir eða á læknastofu“ muni kosta 100 dala sekt.
Litið væri á sjálfsfróun karla sem „aðgerð gegn ófæddu barni,“ segir Farrar en hún veit að frumvarpið verður aldrei að lögum.
„Þetta fékk mig til að hugsa málið. Ef við erum að hugsa um lífið getum við að sjálfsögðu ekki látið sæði fara til spillis,“ sagði Farrar í samtali við BBC.
Heilbrigðisyfirvöld í Texas gáfu síðasta haust út reglur sem skylda læknastofur og sjúkrahús til að láta grafa eða brenna fósturleifar. Reglurnar hafa mætt mikilli andspyrnu heilbrigðisstarfsmanna og talsmanna réttinda kvenna til fóstureyðinga.
Reglurnar taka gildi 19. september en samkvæmt þeim verður sjúkrahúsum, læknastofum sem framkvæma fóstureyðingar og öðrum heilsugæslustöðvum bannað að farga fósturleifum með hefðbundnum hætti. Fram að þessu hafa fyrirtæki sem sérhæfa sig í að farga læknisfræðilegum úrgangi tekið við þeim.