„Þetta var bæði mjög óvænt, skemmtilegt og hálfvandræðalegt,“ segir Robert Kelly í fyrsta viðtalinu sem tekið er við hann eftir að börnin hans ruddust óvænt inn í viðtal sem tekið var við hann í síðustu viku vegna málefna Suður-Kóreu.
Kelly var að ræða við fréttamann BBC í gegnum Skype þegar börnin hans komu óvænt inn í herbergið. Eiginkona Kelly sést einnig á myndskeiðinu þar sem hún forðar börnunum út úr herberginu en það hefur vakið talsverða athygli hversu margir gera ráð fyrir því að hún hljóti að vera barnfóstran.
„Þau voru mjög krúttleg en ég sá myndskeiðið eins og allir aðrir. Þetta var mjög fyndið. Við höfum nánast haft slökkt á símunum síðan á föstudag og ég hef ekkert fylgst með skilaboðum á Facebook eða á Twitter,“ segir Kelly í samtali við Wall Street Journal.
„Þetta er í fyrsta skipti sem þau ryðjast svona inn,“ segir Jung-a, eiginkona Kelly. „Ég hef komið fram í sjónvarpi í talsverðan tíma núna,“ segir Kelly en þá bendir Jung-a honum á að hann læsi oftast að sér og þau hlæja bæði.
Jung-a segir að atburðarásin hafi verið mjög skrítin en hún hafi misst sjónar af börnunum og reynt að finna þau, vitandi að Kelly væri í viðtali.