Erlent | mbl | 21.4.2017 | 11:27

Herða öryggisaðgerðir fram að kosningum

Yfirvöld í Frakklandi segja öryggisviðbúnað vegna fyrri umferðar forsetakosninganna, sem fram fara í landinu á sunnudag, vera mikinn. Einn lögreglumaður lést og tveir slösuðust í skotárás sem beint var gegn lögreglumönnum á Champs Elysees-breiðgötunni í gærkvöldi. Reuters fréttastofan segir árásina varpa skugga á kosningarnar og hafi mögulega áhrif á úrslit þeirra.

Óháði frambjóðandinn Emmanuel Macron naut enn mests fylgis er síðustu skoðanakannanir voru birtar í morgun. Samkvæmt könnun Elabel hlyti Macron 24% atkvæða, Marine Le Pen frambjóðandi frönsku Þjóðfylkingarinnar 21,5%, Francois Fillon frambjóðandi franska Repúblikanaflokksins 20% og vinstri maðurinn Jean-Luc Melenchon 19,5%.

Samkvæmt frönskum lögum er frambjóðendum bannað að vera með framboðsfundi frá og með miðnætti í kvöld og þar til búið er að loka kjörstöðum. Einnig er bannað að láta framkvæma skoðanakannanir á þessum sama tíma.

Eftir árásina í gærkvöld tilkynntu þau Marine Le Pen og Francois Fillon að hætt yrði við þá kosningafundi sem skipulagðir höfðu verið í dag.

Lögreglumenn taka þátt í mínútuþögn í minningu lögreglumannsins sem féll fyrir hendi árásarmanns á Champs Elysee-breiðgötunni í gær. AFP

Bernard Cazeneuve, forsætisráðherra Frakklands, tilkynnti eftir fund með öryggislögreglu og yfirvöldum að búið væri að virkja öryggislögreglu og sérsveitina sem muni taka þátt í öryggisaðgerðum á kjördag ásamt þeim 50.000 lögreglumönnum sem þegar áttu að sinna því starfi.

„Ekkert má hindra þessa grundvallar lýðræðisaðgerð í landi okkar,“ sagði Cazeneuve við fréttamenn. „Það er okkar að láta ekki undan ótta og ógn sem myndi auðvelda óvinum okkar starf sitt.“

Le Pen sökuð um að nýta sér árásina

Hryðjuverkasamtökin Ríki íslams hafa lýst yfir ábyrgð á tilræðinu. Árásarmaðurinn var drepinn af lögreglu. Franskir fjölmiðlar segja hann hafa verið 39 ára gamlan Frakka sem hafi áður hlotið dóm fyrir að reyna að myrða lögreglumenn. Yfirvöld greindu síðan frá því í dag að lýst hefði verið eftir öðrum manni sem talinn er geta tengst árásinni.

Reuters segir árásina í gær hafa beint kastljósi kjósenda að mikilvægi þjóðaröryggis og að árásin kunni því að hafa áhrif á niðurstöður kosninganna á sunnudag. Til þessa hafa Le Pen og Macron verið talin líklegust til að verða þeir tveir frambjóðendur sem kosið verður um í seinni umferð kosninganna þann 7. maí.

Bæði Le Pen og Fillon hafa viljað herða stefnu franskra stjórnvalda í málefnum innflytjenda og telur fréttastofuna árásina mögulega geta aukið fylgi þeirra.

Sakaði Cazeneuve Le Pen nú í dag um að nýta sér árásina í pólitískum tilgangi.

Þetta er þó ekki í fyrsta skipti sem árás er gerð í Frakklandi skömmu fyrir kjördag og hafa slíkar aðgerðir til þessa ekki virst hafa afgerandi áhrif á skoðanir kjósenda, sem þetta árið hafa lýst yfir meiri áhyggjum af atvinnuleysi og skorti á trausti í garð stjórnmálamanna.

Francois Fillon, frambjóðandi franska Repúblikanaflokksins, og Marine Le Pen, frambjóðandi frönsku Þjóðfylkingarinnar, hafa lagt áherslu á að herða innflytjendalöggjöfina. AFP