Rodrigo Duterte, forseti Filippseyja, hefur bannað reykingar á almannafæri en þeir sem brjóta gegn banninu eiga yfir höfði sér allt að fjögurra mánaða fangelsi og 10 þúsund króna sekt. Bannið gildir bæði um reykingar innan- og utandyra.

Hinar nýju reglur banna einnig tóbaksauglýsingar og eiga brotlegir yfir höfði sér allt að þriggja ára fangelsi og háa sekt. Þá mega þeir einnig eiga von á að verða sviptir rekstrarleyfum.

Bannið nær einnig til rafsígaretta.

Duterte var sjálfur mikill reykingamaður en hætti þegar hann var greindur með Buergers-sjúkdóminn, sem getur valdið æðabólgum og blóðtappa.

Í kosningabaráttu sinni hét Duterte því að taka hart á glæpamönnum, spillingu og fíkniefnasölum og -neytendum. Þá sór hann að uppræta lesti á borð við reykingar og ólögleg fjárhættuspil.

Á Filippseyjum eru átta fyrirtæki sem framleiða sígarettur en þau hafa ekki tjáð sig um bannið. Talið er að um 17 milljónir landsmanna reyki, eða nærri þriðjungur fullorðinna.

Ítarlega frétt um málið má finna hjá Guardian.

Tengdar fréttir

Duterte og fíkniefnastríð á Filippseyjum

Skýrslan sýni brýna þörf á alþjóðlegri rannsókn

• Reynt að þagga niður í Ressa
• Mannréttindi fótum troðin á Filippseyjum
• Skjótið vandræðagemsana
• „Handtakið tíkina“

» Fleiri tengdar fréttir

• Blogga um frétt