Erlent | mbl | 28.5.2017 | 16:43 | Uppfært 29.5.2017 4:09

Fleiri handtökur í Manchester

Lögregla hefur lokað af svæði við Moss Side þar sem leitað er í dag. AFP

Breska lögreglan handtók í dag 25 ára gamlan mann í Old Trafford, úthverfi Manchester, í tengslum við hryðjuverkaárásina í borginni á mánudag. 22 létu lífið og 116 særðust þegar Salman Abedi sprengdi sig í loft upp í Manchester Arena-tónleikahöllinni.

Alls hafa því 14 verið handteknir í tengslum við málið í Bretlandi, og eru 12 enn í haldi.

Leita í húsi í Moss Side

Á öðrum stað í borginni hefur lögregla fengið leitarheimild og leitar nú í húsi í Moss Side. Fólk sem býr í nágrenninu segist hafa heyrt sprengingu fyrr í dag, en lögregla hefur ekki svarað því hvort fjarstýrð sprengja hafi verið notuð til að komast inn í húsið. Lögregla hefur lokað götum þar í kring.

Fyrr í dag sagði innanríkisráðherra Bretlands, Amber Rudd, að fleiri samverkamenn Abedis gangi hugsanlega enn lausir. Sagði hún rannsókn málsins er vera í fullum gangi og ekki væri hægt að ganga úr skugga um að öll kurl væru komin til grafar fyrr en rannsókninni væri lokið. Sagði hún að hryðjuverkasamtökin Ríki íslams væru að reyna að fá unga Breta til liðs við sig.

Birtu myndir af Abedi

Breska lögreglan birti í dag myndir úr öryggismyndavélum af Abedi. Myndirnar eru teknar skömmu fyrir árásina. Lögreglan hefur einnig sagt frá því sem hún hefur komist að varðandi síðustu klukkustundirnar í lífi Abedi áður en hann framdi hina hroðalegu árás. Enn er óskað eftir frekari upplýsingum um hvar Abedi var dagana fyrir árásina og hvað hann hafðist að.

Abedi var af líbískum uppruna en fæddur og uppalinn í Manchester. Faðir hans og bróðir hafa verið handteknir í Líbíu vegna rannsóknar málsins.

Lögreglan segir að rannsóknin gangi vel og biðlar nú til almennings að láta vita ef hann veit eitthvað um ferðir Abedi síðustu daga eða frá 18. maí er hann sneri aftur til Bretlands. Um þúsund lögreglumenn í Bretlandi vinna að rannsókn málsins.