Móðir árásarmannsins sem ók sendibifreið inn í hóp fólks fyrir utan Finsbury Park-moskuna í London á sunnudag segir son sinn eiga við vandamál að stríða, en hann sé ekki hryðjuverkamaður.
Einn er látinn og tíu eru slasaðir eftir árásina, sem lögregla tilkynnti strax í upphafi að væri hryðjuverk. Árásarmaðurinn heitir Darren Osborne og er frá Cardiff í Wales. Osborne er 47 ára gamall og fjögurra barna faðir. Vegfarendur yfirbuguðu Osborne og héldu honum föstum þar til lögreglan kom á vettvang en þeir segja að hann hafi sagst vilja drepa alla múslima.
Samkvæmt frétt Sky-News segist móðir hans, Christine, vera að ganga í gegnum „martröð allra mæðra“. Þá segir hún son sinn eiga við vandamál að stríða. „Sonur minn er ekki hryðjuverkamaður. Hann er bara maður sem á við vandamál að stríða og ég veit ekki hvernig ég á að eiga við þetta allt saman.“
„Hann hefur aldrei talað um hryðjuverkaárásir við mig eða sagt ljóta hluti um múslíma - aldrei nokkurn tímann og það er sannleikurinn.“ Þá segir hún hug sinn vera hjá þeim sem urðu fyrir árásinni og aðstandendum þeirra.
Þá hefur Ellis Osborne, frændi mannsins, sagt að hann hafi aldrei viðrað neinar rasískar skoðanir. Í yfirlýsingu fyrir hönd fjölskyldunnar segir hann fjölskylduna vera slegna yfir fréttunum. „Þetta er óskiljanlegt. Við erum niðurbrotin vegna fjölskyldnanna og hugur okkar er hjá þeim sem urðu fyrir árásinni.“
Auk þess hafa nágrannar mannsins tjáð sig við fjölmiðla og sagt hann hafa verið venjulegan heimilisföður.
Eins og mbl.is sagði frá í gær hafa breskir fjölmiðlar birt myndband sem sýnir almenning yfirbuga Osborne, en hann hafði reynt að flýja vettvang. Í myndbandinu má sjá fólk halda honum niðri þar til lögregla mætti á vettvang.
Fólkið sem var samankomið fyrir utan moskuna var að aðstoða mann sem hafði hnigið niður á gangstéttina. Allir þeir sem urðu fyrir bílnum eru múslímar.