Kim Kielsen, forsætisráðherra Grænlands, segir óábyrgt að senda íbúa Nuugaatsiaq og Illorsuit aftur heim. Öryggismálanefnd metur það enn of hættulegt fyrir íbúana að snúa til baka.

Hætta leikur á öðru berghlaupi úr sama fjalli sem aftur gæti fallið í hafið við Nuugaatsiaq. Annað hlaup gæti haft í för með sér aðra flóðbylgju og viðbragðstími er of stuttur fyrir íbúa í þessum tveimur þorpum. Á þessum grundvelli mælir öryggismálanefnd gegn því að íbúarnir snúi aftur. Ríkisstjórn Grænlands tekur undir þau tilmæli.

Ef kæmi til annarrar flóðbylgju telur nefndin að það taki einungis um 8-9 mínútur fyrir bylgjuna að skella á Nuugaatsiaq. Einnig telur nefndin að á þeim tíma geti flóðbylgjan náð 5-10 metra hæð. Fyrir íbúa Illorsuit væri viðbragðstími um 12 mínútur.

Þar að auki er ekkert viðvörunarkerfi til staðar á svæðinu. Kerfi sem hentar í sérstökum aðstæðum á þessu svæði hefur ekki fundist.

Grænlenski fréttamiðillinn Sermitsiaq greindi frá.

Frá þorpinu Nuugaatsiaq á Grænlandi. Ljósmynd/Jón Viðar Sigurðsson

Tengdar fréttir

Jarðskjálfti og flóðbylgja á Grænlandi

Styrkja grænlenskt flóttafólk

• Úthlutaði um 40 milljónum á hamfarasvæðum á Grænlandi
• Öldurnar allt að 90 metra háar
• Veitir aðstoð á Grænlandi
• Flateyringar söfnuðu hálfri milljón

» Fleiri tengdar fréttir

• Blogga um frétt