„Þetta er söguleg atkvæðagreiðsla. Þetta sýnir hversu öflugt lýðræði okkar er og hversu langt samfélagið hefur náð. Við getum sagt núna að við erum öll jöfn,“ sagði Joseph Muscat forsætisráðherra Möltu eftir að lögleiðing hjónabands samkynhneigðra gekk í gildi á Möltu. BBC greinir frá.
Aðeins einn af 67 þingmönnum á Möltu greiddi atkvæði gegn frumvarpinu sem varð að lögum. Fjölmargir fögnuðu niðurstöðunni og flykktust út á götur til að fagna.
Talsvert miklar breytingar hafa orðið á maltnesku samfélagi undanfarin ár þar sem kaþólsk trú er ríkjandi. Til að mynda voru hjónaskilnaðir lögleiddir eftir þjóðaratkvæðagreiðslu árið 2011. Í fyrra varð Malta fyrst Evrópulanda til að banna meðferðir sem eiga að „lækna“ samkynhneigð.