9 ára drengur meðal látinna

Lögreglan í Chicago að störfum.
Lögreglan í Chicago að störfum. AFP

Níu ára gamall drengur er á meðal þeirra sem létust um helgina í skotárásum í Chicago. Alls voru 56 skotnir frá föstudagskvöldi til mánudagsmorguns í borginni, en skotárásir eru þar daglegt brauð í nokkrum hverfum.

Drengurinn lést þegar hann sat um borð í bíl með 31 árs gömlum manni. Annar bíll keyrði upp að bílnum, og byssumaður hóf skothríð. Maðurinn fékk skot í andlit, bringu og bak og er þungt haldinn á sjúkrahúsi í borginni. Drengurinn lést samstundis við skot í bakið.

Alls létust ellefu í skotárásunum.

Skotárásir virðast vera algengari á sumrin í borginni, en þann 4. júlí síðastliðinn, á þjóðhátíaðardag Bandaríkjamanna, voru 101 skotnir og 14 hlutu bana af. Yngsta fórnarlambið var 13 ára gamalt.

Samkvæmt frétt AFP fréttastofunnar eru flestar skotárásirnar tengdar eiturlyfjastarfsemi og gengjum.

mbl.is
Fleira áhugavert
Fleira áhugavert