Umfjöllun fjölmiðla einhliða

Samkvæmt skýrsluhöfundum fjölluðu fjölmiðlar ekki um „allir velkomnir“-stefnu Angelu Merkel …
Samkvæmt skýrsluhöfundum fjölluðu fjölmiðlar ekki um „allir velkomnir“-stefnu Angelu Merkel með gagnrýnum hætti. AFP

Þýskir fjölmiðlar voru ekki nægjanlega gagnrýnir í umfjöllun sinni um flóttamannavandann árið 2015, samkvæmt nýrri skýrslu. Í henni segir m.a. að fjölmiðlar fjölluðu ekki um stefnu Angelu Merkel kanslara með gagnrýnum hætti, né gáfu þeir lögmætum áhyggjum venjulegs fólks vegna hins umfangsmikla aðflutnings gaum. 

Í skýrslunni, sem samin var fyrir Otto Brenner Stiftung undir forystu Michael Haller, fyrrverandi ritstjóra hjá Die Zeit, segir að fram eftir ári 2015 hafi fáar ritstjórnargreinar tekið á áhyggjum, ótta og andstöðu vaxandi fjölda fólks. Í þau skipti sem það gerðist hefði umfjöllunin verið full fyrirlitningar.

Blöðin hefðu ekki gert tilraun til að greina á milli öfgamanna og venjulegs fólks sem væri uggandi vegna óhefts aðflutnings flóttafólks. Þá hefðu blaðamenn, í stað þess að stunda gagnrýna blaðamennsku, einfaldlega hampað afstöðu hinnar pólitísku elítu.

Skýrsluhöfundar komast að þeirri niðurstöðu að umfjöllun fjölmiðla hafi stuðlað að því að mynda gjá milli ólíkra hópa á hinu pólitíska litrófi og orðið til þess að draga úr trausti fólks á fjölmiðlum. Samkvæmt nýlegri könnun Mainz-háskóla sögðust 55% aðspurðra upplifa að fjölmiðlar lygju að þeim kerfisbundið.

Rannsókn Haller náði m.a. til Süddeutsche Zeitung, Frankfurter Allgemeine Zeitung og Die Welt en í skýrslunni segir að ekki hafi kveðið við nýjan tón fyrr en í kjölfar kynferðisárása á konur í Köln á gamlárskvöld 2015. Árásarmennirnir voru flestir frá Norður-Afríku.

Financial Times sagði frá.

mbl.is