Trump hafi líka fordæmt þjóðernissinna

Hvíta húsið segir Trump líka hafa fordæmt hvíta þjóðernissinna.
Hvíta húsið segir Trump líka hafa fordæmt hvíta þjóðernissinna. AFP

Donald Trump, forseti Bandaríkjanna, var líka að fordæma hvíta þjóðernissinna, Ku Klux Klan og nýnasista, þegar hann fordæmdi hatur, ofstæki og ofbeldi frá mörgum hliðum í kjölfar átakanna í Charlottesville í Virginíu sem brutust út á milli hvítra þjóðernissinna og andstæðinga þeirra.

Þetta kemur fram í tilkynningu frá Hvíta húsinu. Athygli vakti að Trump minntist ekkert á hvíta þjóðernissinna heldur fordæmdi hatur og ofbeldi almennt. Hvítir þjóðernissinnar fjölmenntu til Charlottesville á föstudag vegna boðaðs fjöldafundar sem átti að fara fram í gær. Margir úr hópi hvítra þjóðernissinna hafa lýst yfir stuðningi við Trump og hans stefnu.

„Forsetinn sagði mjög skýrt í yfirlýsingu sinni í gær að hann fordæmdi allar gerðir ofbeldis, ofstækis og haturs. Auðvitað falla hvítir þjóðernissinnar, Ku Klux Klan, nýnasistar og aðrir öfgahópar undir það,“ sagði talsmaður Hvíta hússins í tilkynningu. AFP-fréttastofan greinir frá.

mbl.is
Fleira áhugavert
Fleira áhugavert